Ги исполнува ли Златко Перински условите за образование за да биде директор на Фондот за здравство?

TEMU

#1 Најпродаван артикл

Сет од 5 парчиња заштитник на кабли, прекривка за заштита на кабли од ТПУ, додатоци за заштита на кабли, без батерија, за мобилни телефони, комплет за заштита на податочни линии

4.8 (10276)

54 ден

-73%

206 ден

Купи сега

МАКЕДОНИЈА

Ги исполнува ли Златко Перински условите за образование за да биде директор на Фондот за здравство?

01 јули 2026

• од Темелко Тошев

Досегашниот министер за локална самоуправа, Златко Перински, е изборот на Владата за нов директор на Фондот за здравствено осигурување (ФЗО). Тој доаѓа на местото на Сашо Клековски, кој со новата владина реконструкција застанува на чело на Министерството за здравство. Но, назначувањето на Перински отвори дилеми во јавноста – дали неговиот образовен профил соодветствува со строгите законски услови за оваа клучна позиција во здравствениот систем?

Што вели Законот, а што биографијата на Перински?

Законот за здравствено осигурување е дециден кога станува збор за квалификациите кои мора да ги поседува првиот човек на Фондот. Според член 57 од Законот, директорот мора да има:

Најмалку 240 кредити според ЕКТС или завршен VII/1 степен.
Високо образование од точно утврдени области: менаџмент, економски науки, финансии, бизнис администрација, менаџмент со јавното здравство, медицински науки или правни науки.

Од друга страна, официјалната биографија на Златко Перински покажува поинаква образовна позадина:

Основно високо образование: Дипломирал на Факултетот за физичка култура при УКИМ, со што се стекнал со титулата дипломиран професор и тренер.
Постдипломски студии: На Универзитетот за туризам и менаџмент се стекнал со магистерска диплома по менаџмент на човечки ресурси.

Токму оваа комбинација – факултетско образование од областа на спортот и магистратура по човечки ресурси – го наметна прашањето дали е исполнет законскиот услов за раководење со институција која управува со буџетот за здравство на државата.

Владата објаснува: Станува збор за в.д. директор

Во обид да се разјасни оваа правна и административна дилема, се обративме до Владата. Од Илинденска бр. 2 посочуваат дека Перински е назначен како вршител на должност (в.д.) директор, што претставува преодно решение.

„Назначувањето на директор на Фондот за здравствено осигурување е дел од процесот на реконструкција и кадровско екипирање на институциите, кој Владата го спроведува согласно законски надлежности и утврдени процедури, но и подразбира политички процес чиј легитимитет се добива на избори. Станува збор за ново кадровско решение што е законски механизам кој овозможува непречено функционирање на институцијата до завршување на редовната постапка за избор на директор“, се вели во владиниот одговор.

Од Владата додаваат дека во следната фаза ќе биде распишан јавен оглас и ќе биде спроведена целосната законска постапка, поради што сметаат дека прашањата за пријавени кандидати и нивните биографии во овој момент се „неприменливи“. Целта на ова в.д. решение, како што велат, е да се обезбеди континуитет во работата на ФЗО и непречено функционирање на здравствениот систем.

Ветувањата за мерит-систем ставени на тест

Ова назначување доаѓа во специфичен момент. Само минатата недела, Собранието го усвои новиот Закон за високи раководители, закон кој долго се најавуваше како гаранција дека со клучните фондови и агенции ќе раководат најдобрите.

Според најавите за овој Закон, директорите би требало да се бираат на строг конкурс, да бидат најдобро-рангирани и да доаѓаат од редот на вработените во самите институции, воведувајќи вистински мерит-систем. Останува да се види дали најавената „редовна постапка за избор на директор“ на ФЗО ќе биде првиот вистински тест за практичната примена на овие законски ветувања.